RAISI KIKWETE AMEZITAKA JUMUIYA ZA KIMATAIFA KUTEKELEZA MALENGO YA MILENIA KWA UKAMILIFU

 

Raisi wa jamhuri ya muungano wa Tanzania Mh. Jakaya Mrisho Kikwete

Rais wa Jamhuri ya Muungano wa Tanzania, Dk. Jakaya Kikwete, ameitaka Jumuiya ya Kimataifa kuhakikisha malengo ya milenia yanatekelezwa kwa ukamilifu, hata baada ya kuisha muda uliowekwa wa kuyatimiza, kabla ya kuweka malengo mengine duniani.

Kwa mujibu wa Taarifa ya Ikulu kwa vyombo vya habari iliyotolewa jana, Rais Kikwete, ametoa ushauri huo mwanzoni mwa mkutano wa kimataifa unaohusu Afya ya Mama na Mtoto jijini Toronto Canada, alikuwa akijibu maswali kuhusu matokeo ya malengo ya milenia kuelekea mwisho wa muda wa kuyatekeleza mwakani 2015.

"Tukamilishe pale ambapo hatujamaliza na kuimarisha yale yote tuliyoyafanikisha au kuyafikia " Rais amesema na kuwataka Mataifa kuhakikisha kuwa, malengo manane (8) ya milenia waliyojiwekea, yanatekelezwa,kwa ukamilifu kwani ni malengo mazuri na muhimu kwa jamii zetu.

Rais amesema "baada ya kuyaimarisha na kuyatimiza haya malengo manane tunaweza kupanga na kutafuta mengine na pia tuhakikishe kuwa haya ya sasa hayasahauliki wala kutelekezwa ili tusije kurudi nyuma katika jitihada zetu”.

Malengo ya Milenia Kama yalivyoainishwa na Umoja wa Mataifa ambayo nchi zinazoendelea zinatakiwa kuwa zimeyafikia ifikapo mwakaani, ni pamoja na kuondoa umaskini uliokithiri na njaa, Elimu ya Msingi kwa wote, Usawa wa kijinsia na fursa sawa kwa wanawake, kupunguza vifo vya watoto wachanga na upatikanaji wa huduma bora za uzazi.

Mengine ni kupanga na ukimwi, Malaria na magonjwa mengine, kulinda mazingira na kujenga mshikamano wa kimaendeleo duniani.

Mkutano huo unaendelea leo utazungumzia njia mbalimbali ambazo mataifa hayo yanatakiwa kuzifanya kwa pamoja katika jitihada zozote za kuimarisha afya ya Mama na Mtoto ambapo Raisyuko nchini humo kwa kuitikia mwaliko wa Waziri Mkuu wa Canada, Stephen Harper kuanzia Mei 27-30 mwezi huu.