TANZANIA YAONGOZA KWA MIFUGO AFRIKA MASHARIKI lakini isiyokuwa na tija

 

Tanzania imetajwa kuwa nchi inayoongoza kuwa na mifugo wengi katika ukanda wa Afrika Mashariki, huku idadi ya Ng’ombe wanaofugwa kienyeji ni wengi kuliko wanaofugwa kwa njia ya kisasa katika ukanda huo, ambapo wafugaji wametajwa kujikosesha pato katika soko la ngozi kwa kupiga chapa kwenye mifugo hiyo.

Afisa Mifugo na Uvuvi katika Wilaya ya Igunga mkoani Tabora, Dakt. Emmanuel Masaki,  amesema Tanzania inakabiliwa na tatizo hilo kwa asilimia kubwa huku akisema ili kunufaisha wafugaji katika wilaya hiyo tayari imeweka mikakati ya kutoa elimu ya ngozi kwa wafugaji wa mifugo hiyo ili waweze kusindika na kujipatia kipato maradufu kupitia zao hilo.

Aidha, amesema wataalamu wa zao hilo wameanza kutoa elimu na angalizo kwa wafugaji ili kutunza mifugo yao na kuacha tabia ya kuweka alama ‘chapa’ kwenye ngozi ya mifungo hao ili kuimarisha zao hilo kwa kiwango kikubwa.

“Wafugaji wanaofuga N’gombe na kuwawekea alama kwa kuwachoma katika sehemu mbalimbali za miili ya Ng’ombe lakini hii inasababisha hasara kwa mfugaji kwamaana ukienda sokoni hutaweza kupata biashara na ninawasihi waweze kuachana na hiyo tabia ili wawe na ufugaji ulio mzuri” alisema Masaki. 

  Mkoa wa Tabora unashika nafasi ya pili kwa kuwa na mifungo mingi nchini ikiwemo Ng’ombe, ukifuatiwa na mkoa wa Shinyanga huku mkoa wa Lindi ukishika nafasi ya mwisho kwa kuwa na mifugo isiyozidi elfu hamsini (50,000).

Imebainika kuwa licha ya Tanzania kuwa na mifugo mingi uvunaji wa zao la ngozi bado unakabiliwa na changamoto kwa wafugaji kupoteza fursa ya kjipatia pato katika ukanda wa Afrika mashariki, huku nchi ya Kenya ikiongoza kwa uvunaji wa ngozi za mifugo na kutoa ajira nyingi kwa wajasiriamali mali tofauti na Tanzania ambayo ina idadi kubwa ya mifugo hao.

Hata hivyo, baadhi ya wafugaji wa mifungo wilayani humo wamesema hawatambui thamani na umuhimu wa zao hilo linalotokana na utunzaji wa ngozi ya mifugo hao, ambapo wamesema baada ya kupatiwa elimu hiyo inaweza kuwafanya wengi wao kutambua thamani ya ngozi hiyo sokoni.