MAKALA YA KIJAMII FAMILIA NI MZIZI WA TATIZO LA WATOTO WA MITAANI

Na Ferdinand  Shayo,Arusha.

Idadi ya watoto wa mitaani inazidi kuongezeka kila kukicha huku hakuna hatua madhubuti zinazochukuliwa kupunguza kama sio kuondoa kabisa tatizo hilo.

Tatizo la watoto wa mitaani lilianzia kwenye familia likakua likawa tatizo la jamii baada ya kukua kwa kasi la kawa tatizo la taifa na kwasasa  ni tatizo la dunia nzima.

Ni ukweli usiopingika kuwa chanzo cha tatizo hili ni familia ,watoto wanapozikimbia familia zao kwasababu mbali mbali kukosa mahitaji muhimu,migogoro ya kifamilia,kutengana kwa wazazi kunawapelekea watoto kuzikimbia familia zao na kuishia kuranda randa mitaani.

Tatizo hili linaanzia kwenye familia  huko ndiko mzizi ulipo ,iwapo tunahitaji kuukata mti wa watoto wa mitaani ama kuung`oa tunahitaji kwenda kwenye familia ndiko kuna mizizi na shina lasivyo tutakua tunapunguza majani  ama kupunguza matawi lakini si kukata mti.

Meneja Uhusiano wa shirika lisilokuwa la kiserikali la The Foundation of Tommorrow  Anton Asukile Aton anaeleza kuwa ni vyema familia zikajijengea uwezo wa  kutatua changamoto zinazowakabili pamoja na migogoro inayowakabili ili kuepuka migongano inayopelekea wazazi kutengana na kuwaacha watoto bila msaada hali inayowapelekea kutimikia mitaani.

Anton anaeleza kuwa migogoro mingi katika familia imekua chanzo cha familia kuporomoka  watoto wanabaki ukiwa bila mahitaji maalumu,matunzo na malezi hata kuamua kuingia mitaani na kutafuta maisha.

Suala lingine ni matatizo ya kiuchumi wazazi wanapokuwa katika hali mbaya ya kiuchumi na kushindwa kuihudumia familia ,watoto wanalazimika kwenda mitaani kujitatufitia mahitaji yao baadae wanakuwa watoto wa mitaani.

Asukile anasema kuwa familia kujenga uchumi imara utakaozisaidia familia zao kupata mahitaji hata inapotokea mzazi mmoja amefariki aliyebakia aweze kuhudumia familia watoto wasisambaratike mitaani kwa kukosa mahitaji muhimu.

“Shirika letu tunajitahidi kuwapatia mikopo wazazi ili waweze kufanya ujasiriamali kujipatia kipato kitakachowawezesha kumudu mahitaji ya familia zao” Alisema Meneja huyo

Anaeleza hatari iliyopo kutokana na ongezeko kubwa la watoto wa mitaani ni pamoja na kukithiri kwa matukio ya uhalifu,watumiaji wa madawa ya kulevya  na uovu katika jamii.

Endapo tatizo la watoto wa mitaani halitatatuliwa linaweza kuwa tatizo kubwa kwa jamii pale ambapo watageuka na kuwa wahalifu,watumiaji wa madawa ya kulevya na  majambazi jamii haitasalimika hivyo ni vyema wakavalia njuga suala hilo.

“Mfululizo wa matukio ya uhalifu unaposikia habari za panya road ni hawa hawa watoto wa mitaani wanaungana na kufanya ujambazi na ukatili,jamii isifumbie macho suala hili na kuona kuwa hawahusiki kwani  madhara yake yatawakumba na kuwaathiri” Alisema Anton

Anton Asukile amesema kuwa jamii imekuwa na mtizamo hasi juu ya watoto wa mitaani na kuwanyooshea vidole huku wakiwatelekeza bila kuchukua hatua jambo ambalo linasababisha tatizo hilo kukosa ukomo .

Jamii inatakiwa ishiriki katika kutatua tatizo la watoto wa mitaani linalozidi kuongezeka kila kukicha badala ya kukaa kimya na kuyaachia mashirika binafsi pamoja na serikali hali inayosababisha tatizo hilo kukua badala ya kupungua

.

Tanzania  inakadiriwa kuwa na watoto wa mitaani wanaoishi katika mazingira magumu  pamoja na yatima milioni 2.4 kwa mujibu wa takwimu za wizara ya  Maendeleo ya Jamii, Jinsia na Watoto.

Watoto wanaishi mitaani wameendelea kuongezeka kutoka 1,579 mwaka 2007 hadi 2,010 mwaka 2011, wakati watoto 11,216 wanaoishi katika Vituo vya Kulelea Watoto kati yao 6,089 ni wavulana na 5,127 ni wasichana.

 Watoto yatima waliopo nchi nzima wamefikia 2,400,000 kati ya hao Wasichana ni 1,055,000 na Wavulana ni 1,345,000, ambapo idadi ya watoto 2,700 kati ya miaka 0-14 wanaishi na Virusi vya Ukimwi nchini.

Ni jukumu la kila mtu kuhakikisha kuwa tatizo la watoto wa mitaani linatatuliwa na kupatiwa ufumbuzi kwani linapoachwa  tatizo hilo linalozidi kuongezeka kila kukicha badala ya kukaa kimya na kuyaachia mashirika binafsi pamoja na serikali hali inayosababisha tatizo hilo kukua badala ya kupungua.

Mabadiliko ni wewe ni mimi ni sisi

Ferdinandshayo@gmail.com

0765938008