IPTL YAISHITAKI TRA KWA KUTAKA KUFUTA HATI ZA MALIPO

 

 

Dar es Salaam. Bodi ya Rufani za Kodi (TRAB), imetoa amri ya zuio la muda kwa Kamishna Mkuu wa Mamlaka ya Mapato Tanzania (TRA) kuhusu kusudio lake la kufuta hati ya malipo ya kodi iliyotokana na uuzwaji wa hisa za Kampuni ya Kufua Umeme ya IPTL.

Uamuzi huo wa TRAB ulitolewa na Katibu wake, Respecius Mwijage kutokana na maombi yaliyofunguliwa na Kampuni za Pan Africa Power Solution Tanzania Limited (PAP) na IPTL dhidi ya Kamishna Mkuu wa TRA na Msajili wa Kampuni ya Usajili wa Leseni (Brela).

PAP na IPTL zilifungua maombi hayo, baada Kamishna Mkuu wa TRA kuziandikia barua ya kusudio la kuziondoa hati hizo kwa madai ya kuwapo kwa mkataba bandia wa mauziano ya hisa hizo kati ya Kampuni ya Mechmar na Piperlink Investment Limited sambamba na kati ya Piperlink na PAP.

Katika maombi yake, PAP na IPTL ziliomba walalamikiwa wazuiliwe aidha wao wenyewe, mawakala wao, waajiri wao au mtu yeyote atakayefanya kazi kwa niaba yao kuondoa hati hizo zinazothibitisha kulipwa kwa kodi ya ongezeko la mtaji kuhusiana na uuzaji wa hisa.

Hati hizo namba 004965600 na 0049657 zilitolewa kwa ajili ya uuzaji wa hisa kutoka Mechmar na Piperlink Investment Limited na kati ya Piperlink na PAP.

Katika maombi hayo yaliyoambatanishwa na hati ya kiapo cha wakurugenzi wa kampuni hizo, Manraj Bharya na Parthiban Chandrasakaran, waliomba zuio la kuondolewa kwa hati hizo hadi rufani yao waliyokata katika bodi hiyo kupinga uamuzi wa TRA itakaposikilizwa na kutolewa uamuzi.

Katika uamuzi wake, TRAB ilikubaliana na maombi hayo na kutoa amri hiyo ya zuio la Mkuda kusubiri uamuzi wa rufaa hiyo.

“Nia ya kuondoa hati hizo ilitolewa na Kamishna Mkuu wa TRA, kupitia barua yake ya Novemba 19, mwaka huu, ikielekezwa kwa Msajili wa Brela isimamishwe hadi maombi yatakaposikilizwa Desemba 10, mwaka huu.” alisems Katibu Mwaijage

Kwa mujibu wa hati hizo za viapo zilizoambatanishwa katika maombi yake, PAP na IPTL zimesajiliwa kihalali nchini kwa mujibu wa sheria za kampuni na kazi zao ni kufanya shughuli za kuzalisha umeme.

Zinaeleza kuwa kama TRA haitazuiliwa kutekeleza azma yake ya kuziondoa hati hizo kusubiri uamuzi wa rufaa yake, basi mlalamikaji ataingia hasara isiyolipika.

Mbali na rufaa hiyo waliyokata TRAB, pia walalamikaji wanadai kuwa kwa sasa kuna kesi mbalimbali ambazo bado zinaendelea Mahakama Kuu na nyingine Mahakama ya Biashara.