Mkenya anayehusishwa na ugaidi kwao na wenzake 16 kizimbani Dar

JESHI la Polisi nchini limemkamata na kumfikisha Mahakamani mmoja wa watuhumiwa wa matukio ya ugaidi nchini Kenya, Jihad Gaibon Swaleh, raia wa Kenya na kusomewa mashtaka ya kuhusika na vitendo vya kigaidi nchini Kenya na kula njama na kuingiza watu nchini kwa ajili ya vitendo vya kigaidi.

Aidha mbali na mtuhumiwa huyo watuhumiwa wengine 16 wakazi wa jijini Dar es Salaam ambao wanadaiwa kuendesha vitendo vya kigaidi nchini na tuhuma za kula njama ya kutenda makosa ya kigaidi nchini.

Hata hivyo, upande wa mashtaka umeongozwa na mwendesha mashtaka Serikali, Prosper Mwangamila, ambaye amedai Mahakamani hapo mbele ya Mahakama ya Hakimu Mkazi Kisutu jijini Dar es Salaam, kuwa mtuhumiwa wa matukio ya ugaidi nchini Kenya alitumia mtandao wa kijamii wa ‘Facebook’ kushawishi watu wengine kuwasiliana kwa lengo la kutafuta vifaa vya kulipua mabomu nchini Kenya na kusababisha majerahi, hofu na Vifo nchini humo.

Mtuhumiwa huyo amesomewa mashtaka mawili ambapo pia hakuruhusiwa kujibu kitu chochote, kutokana na mashitaka hayo kuangukia katika makosa ya ugaidi ambayo kwa mujibu wa sheria Mahakama ya Hakimu Mkazi haina mamlaka ya kuendesha kesi za namna hiyo.

Katika kesi ya kwanza kwa washtakiwa 16 ambao ni, Nassor Abdallah, Hassan Suleimani, Anthari Ahmed, Mohamed Yusuph, Abdallah Hassan maarufu kama Jibaba, Hussein Ally, Juma Juma, Said Ally, Hamis Salum, Said Salum, Abubakar Mngodo, Salum Salum, Salum Amour, Alawi Amir, Rashid Nyange au Mapala na Amir Juma, walisomewa mashtaka hayo mbele ya Hakimu Mkazi Mkuu, Hellen Riwa wa mahakama hiyo.

Imedaiwa Makahamani hapo kuwa watuhumiwa wanadaiwa kutenda mokosa hayo kati ya Januari, 2013 na Juni 2014 katika maeneo tofauti hapa nchini, washtakiwa wote 17 wamerudishwa rumande ambapo kesi yao itatajwa tena Julai 23, 2014.