MRADI wa barabara Arusha- Holili- Voi wazinduliwa

 

Arusha,Mkuu wa mkoa wa Arusha, Magesa Mulongo  amezindua mradi wa ujenzi wa barabara ya njia nne kutoka Arusha hadi Tengeru na Arusha-Holili-Taveta hadi Voi nchini, Kenya mradi ambao unatarajiwa kuondoa msongamano wa magari kati kati ya jiji na  kukuza biashara ya aina ya nchi za Afrika ya Mashariki.

Akizungumza katika uzinduzi wa mradi huo, ambao ulihusisha wadau wa barabara hiyo, Naura Spring Hoteli , Mulongo alisema mradi huo, utakuwa na manufaa makubwa kwa  wakazi wa jiji la Arusha na wakazi wa Afrika ya Mashariki kwa ujumla, kwa kuwa  utarahisisha shughuli za kiabiashara na kuondoa misongamano katika barabara kuu .

Mulongo alishukuru benki ya maendeleo ya Afrika(AfDB) kwa kukubali kutoa fedha kwa ajili ya miradi hiyo, ambapo pia aliwaomba wakazi wa mkoa wa Arusha, kutoa ushirikiano kwa makandarasi wa miradi hiyo itakayoanza mwishoni mwa mwaka huu, ikiwepo kuacha  kujihusisha na vitendo vya wizi.

"katika taarifa ya mtendaji Mkuu wa Wakala wa Barabara nchini,amesema miongoni mwa changamoto katika miradi hii ni wizi ambao unafanywa na wananchi katika maeneo ya miradi na gharama za fidia na malipo kwa halmashauri sasa lazima tusaidie miradi hii kuondoa changamoto hizi"alisema Mulongo

Akizungumza kwenye uzinduzi huo, Meneja wa Wakala wa Barabara Mkoa wa Arusha, Deusdedit Kakoko alisema mradi huo unaofadhiliwa na Benki ya Maendeleo ya Afrika (AfDB),kuna nyumba zaidi ya 700 zinavunjwa na tayari fidia imeanza kutolewa.

"katika miradi hii ambayo itakwenda kwa awamu, tayari kuna maeneo watu wamelipwa fidia na wengine bado lakini ambao tumewalipa fidia tunaomba waanza kubomoa nyumba zao kwani ifikapo agosti mosi tutazibomoa"alisema Kakoko

AwaliMtendaji Mkuu wa Tanroads, Patrick Mfugale, alisema ujenzi huo unahusisha upanuzi wa barabara ili iwe na njia nne kutoka eneo la Sakina hadi Usa River.

Mfugale alisema mradi huo utatekelezwa kwa awamu mbili ikiwemo Sakina-Tengeru (km 14.2) na barabara ya pembeni mwa jiji la Arusha (Arusha Bypass) (km42).

“…na awamu ya pili itahusisha ujenzi wa kipande cha Tengeru-Usa River (km 8.1) na kisha marekebisho ya barabara hiyo hadi Holili yataendelea.”

Alisema ujenzi wa barabara hiyo na nyingine ni sehemu ya Mpango wa Uendelezaji wa Mtandao wa barabara za Afrika ambao Nchi wanachama wa Jumuiya ya Afrika Mashariki waliuandaa.

Alisema kuanza kwa ujenzi huo kunafuatia kukamilika kwa upembuzi yakinifu na usanifu wa kina.

Mhandisi Mwandamizi katika masuala ya Uchukuzi kutoka Patrick Musa, alisema barabara ya Arusha-Holili/Taveta-Voi itakuza biashara mingoni mwa nchi wanachama wa EAC.

Alisema benki hiyo itaendelea kusaidia nchi za ukanda wa Afrika Masharikui katika masuala ya miundombinu ya barabara ili kukuza maendeleo.