SIKIKA TANZANIA YAITAKA SERIKALI KUCHUKUA HATUA DHIDI YA FEDHA ZA UKIMWI ZILIZOTUMIKA VIBAYA

RIPOTI ya Mkaguzi na Mdhibiti Mkuu wa Hesabu za Serikali (CAG), imebaini kuwepo kwa kiasi kikubwa cha fedha za miradi ya kudhibiti maambukizi ya Ukimwi ambazo hazikutumika kwa mwaka wa fedha 2013/14 na kufanya jumla ya Halmashauri 58 kushindwa kutumia kiasi cha shilingi bilioni 2.3 za Tanzania.

Kwa mujibu wa taarifa iliyotolewa na Shirika lisilo la Kiserikali la Utetezi wa Afya (SIKIKA), kwa vyombo vya habari  leo Ijumaa Mei 23, 2014 imesema kwa Shirika hilo linaitaka Serikali kupitia Wizara ya fedha ‘Hazina’ kuhakikisha fedha za miradi hiyo zinatolewa kwa wakati ili kuwezesha utekelezaji wa shughuli zilizopangwa.

Shirika hilo limesema kiasi kingine cha fedha za Virusi Vya Ukimwi (VVU) na Ukimwi ambacho hakikutumika ni shilingi milioni 624.49 za Mradi wa Taifa wa Kudhibiti Ukimwi (NACP), pamoja na shilingi milion 307.2 za Tume ya Taifa ya Kudhibiti Ukimwi (TACAIDS) pamoja na milioni 428.49 za Tanzania zilizotengwa kwa Wizara ya Tawala za Mikoa na Serikali za Mitaa (TAMISEMI), wamesikitishwa kuona kiasi hicho kutotumika wakati utoaji wa huduma za VVU na Ukimwi ukikabiliwa na changamoto nyingi kama CAG alivyoainisha hali ambayo inasababisha kutokukamilika kabisa kwa shughuli zilizopangwa.

Hata hivyo, baadhi ya sababu za kutotumika kwa kiasi hicho cha fedha zilitajwa na CAG kuwa ni pamoja na ucheleweshwaji wa fedha kutoka Hazina na urasimu katika matumizi ya fedha za miradi kwenye halmashauri ambapo SIKIKA imehuzunishwa kuona kuwa hayo yanatokea wakati ambao bado kuna uhitaji mkubwa wa huduma za VVU na Ukimwi katika jamii.

Aidha, imesema Mamlaka za serikali za mitaa zinatakiwa kutekeleza shughuli kulingana na mipango na bajeti bila kuchelewa na (TAMISEMI) isimamie utekelezaji wa shughuli hizo katika ngazi ya halmashauri ili kupunguza au kumaliza tatizo la kiasi cha fedha zinazotakiwa kufika katika maeneo husika ifikapo mwishoni mwa mwaka.

Kumbukumbu zinaonyesha kuwa, utafiti juu ya Maoni ya watumia huduma za VVU na Ukimwi uliochapishwa na Sikika mwaka 2013, ulionesha kuwa upungufu wa upatikanaji wa huduma za VVU na Ukimwi una athari za moja kwa moja kwa WAVIU moja ya athari hizo ni pamoja na gharama kubwa za usafiri kufuata huduma za afya, kukosa usiri wakati wa kutoa ushauri nasaha kutokana na uhaba wa vyumba katika vituo vya huduma, pamoja na kutokuwepo kwa huduma endelevu za vipimo vya CD4 na wagonjwa kutozingatia matibabu kunakochangiwa na uhaba wa dawa za ARVs.

Pamoja na hayo mkakati wa tatu wa Taifa wa Kudhibiti Ukimwi Tanzania (NMSF III) umewahi kutaja sababu za upatikanaji wa huduma duni za VVU na Ukimwi kuwa ni uhaba na kutokuwa na uhakika wa fedha, umbali wa kufikia vituo vya huduma hususani vijijini, hali inayochangia WAVIU kutohudhuria kliniki mara kwa mara.