SERIKALI YARIDHIA KNCU KUUZA SHAMBA KULIPA DENI LA CRDB.

 
 
Fadhili Athumani na Rodrick Mushi, Moshi
HATIMAYE Serikali imeridhia kuuzwa kwa shamba la Gararagua
linalomilikiwa na chama kikuu cha ushirika mkoani Kilimanjaro (KNCU),
ili kulipia deni la shilingi bilioni 3.9 linalodaiwa chama hicho na
benki ya CRDB.

Awali Serikali kupitia kauli ya Waziri wa Kilimo Chakula na Ushirika,
Christopher Chiza aliyoitoa Bungeni, ilizuia jaribio la kuuzwa kwa
shamba hilo na kuagiza ofisi ya Mrajisi wa Vyama vya Ushirika
kuichunguza KNCU kuhusu shutuma za ubadhirifu wa mali za Ushirika.
Akizungumza na wajumbe wa Mkutano mkuu maalum wa KNCU, uliofanyika
juzi, mjini Moshi, mkoani Kilimanjaro, Naibu Waziri wa Kilimo, Chakula
na Ushirika, Godfrey Zambi, alisema kuuzwa kwa shamba hilo kutaiepusha
Ushirika na hatari ya mali za wanachama kufilisiwa.
"Mnakubali kwamba mna mzigo wa deni? Mnakubali kwamba shamba la
gararagua ni mali yenu? Na je mnakubali kwamba shamba hilo liuzwe
kulipa madeni? Kama wote mnaazimia hakuna budi shamba likauzwa,
hatuwezi kuruhusu deni hili kuendelea kuwepo maana uwepo wake unaweza
kupelekea kufilisika kwa KNCU," alisema Zambi.
Zambi alisema mpaka sasa hati zote za mali zinazonilikiwa na ushirika,
zinashikiliwa na Benki ya CRDB kutokana na deni hilo ambalo ni la muda
mrefu huku KNCU ikiendelea kulazimika kulipia riba ambayo imekuwa
ikiongezeka kila mwaka.
Aidha Zambi aliiagiza Bodi ya KNCU kuhakikisha inaanzisha mchakato wa
kuundwa kwa chombo maalum kitakachosimamia zoezi zima la uuzwaji wa
Shamba hilo ambapo mmoja wa wajumbe wake atatoka benki ya CRDB.
Maelekezo mengine ni shamba hilo kufanyiwa uthaminishaji upya na
kufunguliwa kwa akaunti ya ESCROW ambayo itatumika kuhifadhi fedha
zitakazotokana na uuzwaji wa shamba.
Awali akimkaribisha Naibu Waziri, Mwenyekiti wa Bodi ya KNCU, Maynard
Swai aliitupia lawama Ofisi ya Mrajisi kupuuza maazimio halali ambayo
yamekuwa yakifanywa na chama hicho, ikiwemo swala la uuzwaji wa shamba
na kupelekea KNCU kupata hasara ya shilingi milioni 250 kama riba
kutokana na deni lililoko CRDB.
Kwa upande wake mmoja wa wajumbe wa mkutano huo, Rajabu Nkya alielleza
kutoridhishwa na hatua ya KNCU kuuza mali kinyume na Agizo la Rais,
Jakaya Kikwete la kutotaka vyama vya ushirika kutouza mali zake
kiholela.