SEEDCO YAZINDUA MASHINDANO YA MASHAMBA DARASA

 Meneja Masoko wa Kampuni ya Mbegu ya Seed Co,Frank Wenga(kulia)akizungumza na waandishi wa habari jana,jijini Arusha juu shindano la wanafunzi wa Shule za msingi, Kanda ya Ziwa litakalowezesha shule itakayoshinda kupata madawati 100 yenye thamani ya Sh.15 milioni,kushoto ni Meneja Mauzo ,Daniel Mwambugi.Picha na Ferdinand Shayo

 Meneja Mauzo wa Kampuni ya Mbegu ya Seed Co yenye makao yake jijini Arusha,Daniel Mwambugi(kushoto) na Meneja Masoko,Frank Wenga wakionesha fomu itakayotumiwa na wanafunzi wa Shule za msingi, Kanda ya Ziwa kujaza kwa ajili ya kushiriki shindano la kuandaa shamba la mahindi litakalowezesha shule itakayoshinda kupata madawati 100 yenye thamani ya Sh.15 milioni.Picha na Ferdinand Shayo

Na Ferdinand Shayo,Arusha.

Kampuni ya Uzalishaji mbegu ya SEEDCO imezindua mashindano ya mashamba darasa kwa shule za msingi zilizopo katika mikoa ya kanda ya ziwa  ambapo shule itakayolima shamba zuri itajishindia zawadi ya madawati 100 yenye thamani ya shilingi milioni 15.

Meneja Masoko wa Kampuni hiyo Frank Wenga  amesema kuwa wameamua kufanya  mashindano hayo baada ya kugundua changamoto kubwa ya elimu katika somo la kilimo ambacho ni uti wa mgongo wa uchumi wa nchi hii ili kufikia malengo ya kufanya kilimo chenye tija ni vyema kuwafundisha  Watanzania kilimo na wameamua kuanza na wanafunzi wa shule za msingi.

Akizungumza na Waandishi wa Habari amesema kuwa shindano hilo ni mahususi kwa shule za msingi zilizopo mikoa ya kanda ya kaskazini  ambayo ni Kagera,Kigoma,Tabora,Geita,Shinyanga,Simiyu,Mwanza na Mara.

“Mbali na zawadi kuu ya madawati 100 yenye thamani ya shilingi milioni 15 za kitanzania ,zawadi nyingine zitakuwa ni sare za michezo,vibao vya kuandikia,madaftari na kalamu na pia mwalimu ambaye ataifanya shule yake ishinde atazawadiwa simu ya kisasa ya mkononi” Alisema Meneja huyo

Frank Wenga alisema kuwa fomu za kujiunga na shindano hilo zitapatikana katika maduka ya mawakala yaliyothibitishwa kuuza mbegu za Seedco na mwisho wa kujisajili ni August 30 mwaka huu.

“Kampeni hii ya mashindano imelenga kuwafundisha kilimo kwa njia ya vitendo wanafunzi wa shule za msingi na kutoa zawadi zitakazowapa motisha ya kupenda kilimo tangu wakiwa shuleni” Alisema Wenga

Anafafanua kuwa wanafunzi watajifunza kulima kwa kuzingatia misingi ya kilimo bora cha kisasa  ni pamoja na kutumia mbegu bora,mbolea za kupandia na kukuzia na uhifadhi bora wa mazao baada ya kuvuna.