Jeshi la Polisi limewatimua mafunzo Wanafunzi 212 kwa kugushi vyeti!!!!!!

JESHI la Polisi Nchini, limewafukuza mafunzoni wanafunzi 212 katika chuo cha Taaluma ya Polisi Moshi (MPA), kwa kosa la kugushi vyeti vya elimu ya sekondari ili kujiunga na Jeshi hilo  PRINCEMEDIA TZ imebaini.

Kamishina wa Utawala na Utumishi wa Jeshi la Polisi nchini, Thobias Andengenye, ameiambia PRINCEMEDIA TZ leo Ijumaa Mei 9, 2014  kuwa zoezi hilo limefanyika rasmi leo ambapo hatua hiyo imekuja wakati muafaka wakati kukiwa na udanganyifu mwingi unaofanywa na watu mbalimbali ili kuweza kupenyeza katika Jeshi hilo.

Amebainisha kuwa, Jeshi hilo kwa kushirikiana na Baraza la Mtihani la Taifa (NECTA), walifanya zoezi la uhakiki wa vyeti vya wanafunzi hao ndipo ilipo bainika kuwa wanafunzi 212 kati ya wanafunzi 3,390 waligushi vyeti vya elimu ya sekondari kwa lengo la kujiunga na Jeshi hilo.
Andengenye, amesema kufuatia hali hiyo Jeshi hilo nchini, limewaachisha mafunzo ya ‘uaskari’ wananfunzi hao ili hatua nyingine za kiupelelezi ziendeleee kuchukuliwa kwa kushirikiana na taasisi nyingine zinazohusika.
Amesema ili kuhakikisha Jeshi hilo linaendelea kuwa na ‘Askari’ wenye weledi na uamifu kwa raia na taifa kwa ujumla, wataelenda kufanya uhakiki wa vyeti kwa wanafunzi wote ili kuwabaini wale wote wanao gushi vyeti.
“Itambulike kuwa kitendo chochote cha kugushi ni kosa la jinai na pindi mtu anapobainika kufanya hivyo Jeshi la Polisi, halitasita kuwachukulia hatua za kisheria” alisema Andengenye.

Alitumia nafasi hiyo kuwaasa wananchi kuacha tabia ya kugushi vyeti au kutumia vyeti ambavyo si halali, na badala yake wafuate taratibu na sheria zilizopo kwa ustawi wa Taifa.

Jumla ya wanafunzi 3,415 waliripoti katika chuo hicho Desemba 10 mwaka 2013, wanafunzi wa mafunzo ya uaskari 25 waliachishwa mafunzo na kufanya idada hiyo kupungua na kufikia wanafunzi 3,390, kutokana na matatizo ya kiafya na makosa ya Kinidhamu.

Matukio ya Askari ‘feki’ na utovu wa nidhamu

Kumbukumbu zinaonyesha kuwa, tangu mwaka 2012 baada ya Rais Jakaya Kikwete, kuliagiza Jeshi hilo nchini kuwafukuza kazi Askari wote wasio waadilifu, Askari Polisi wasio na taaluma ya Jeshi hilo waliripotiwa kuwepo katika maeneo mengi nchini, likiwemo lile la Jeshi hilo mkoani Kilimanjaro, kuwafukuza kazi Askari (watatu) kwa tuhuma za kufanya shughuli za udalali na kuuza mali ya mdaiwa.

Hata hivyo, kumbumbu zinaonyesha kuwa katika kipindi cha mwaka 2013, siku chache baada ya Trafiki ‘feki’ mwenye ‘Cheo cha Sajenti’ kukamatwa jijini Dar es Salaam akiongoza magari, mapya yalizidi kuibuka baada ya Jeshi hilo Kanda Maalum ya Dar es Salaam kuwakamata watu (7) waliotuhumiwa kuwa majambazi wakiwa wamevalia sare za Jeshi hilo wakiwa na vyeo tofauti.