Rais Kikwete kuhutubia Bunge Maalum la Katiba – Ijumaa 21, Machi 2014

RAIS Jakaya Kikwete, sasa amepangiwa kulihutubia Bunge Ijumaa Machi 21 mwaka huu sa 10 jioni, siku tatu baada ya Mwenyekiti wa Tume ya Katiba, Jaji Joseph Warioba, kuwasilisha rasimu ya Katiba Mpya katika Bunge la katiba na kuibua mjadala mzito katika nchi.

Kabla ya Jaji Warioba kuwasilisha, alipata changamoto Jumatatu jioni baada ya wajumbe wa Bunge la Katiba kutaka kanuni zifuatwe kwa Rais kuhutubia kwanza kabla ya Mwenyekiti wa Tume ya Katiba kuwasilisha, lakini walikubaliana na kuwasilisha Jumanne asubuhi.

Taarifa ya Katibu wa Bunge la Katiba, Yahaya Hamis Hamad,  inaonyesha kwamba Rais Kikwete ataongozana na viongozi wakuu wa kitaifa na atawasili Bungeni saa tisa alasiri.

Rais Kikwete anahutubia Bunge la Katiba kwa mujibu wa kanuni ya 75 (1), inaeleza taarifa ya Katibu wa Bunge la Katiba.

Pamoja na Rais Kikwete, viongozi wa kitaifa watakaongia bungeni kwa maandamano ni Makamu wa Kwanza wa Rais Zanzibar, Balozi Seif Ali Idi na Makamu wa Rais wa Jamhuri ya Muungano, Dk. Mohamed Gharib Bilal.

Kwa upande wake, Mwenyekiti wa Bunge la Katiba, Samuel Sitta,  amewaalika  watendaji wakuu kutoka pande zote za Muungano, marais wastaafu, mawaziri wakuu wastaafu, waziri kiongozi mstaafu na maspika wastaafu.

Katika mwaliko huo wamo Mama Maria Nyerere na Mama Shadia Karume pamoja na Mwenyekiti wa Tume ya Marekebisho ya Katiba, Jaji Joseph warioba.