VYAMA VYA SIASA VYATAKIWA KUDUMISHA AMANI JIMBO LA CHALINZE

 

OFISI ya Msajili wa Vyama vya Siasa Nchini, imevitaka Vyama vinavyoshiriki katika Uchaguzi mdogo wa Ubunge katika Jimbo la Chalinze, kutojichukulia Sheria Mkononi wakati wa Kampeni uliobaki na katika siku ya Uchaguzi huo, utakaofanyika April 6, mwaka huu.

Msajili Msaidizi wa Vyama vya Siasa nchini Sisty Nyahoza, katika taarifa yake kwa Vyombo vya habari amesema kampeni za Uchaguzi huo zinaendelea Vizuri, licha ya kuwepo kwa matukio machache ya uvunjifu wa amani, kwa baadhi ya Wafuasi wa Vyama vinavyoshiriki Uchaguzi kujichukulia Sheria Mkononi.

Aidha amevitaka Vyama hivyo, kudhibiti hali hiyo ya uvunjifu wa amani hususani kwa makundi ya vyama hivyo, ambayo mara nyingi yamekuwa chanzo cha vurugu katika chaguzi mbalimbali hapa nchini.

Jeshi la Polisi latoa tahadhari

Jeshi la Polisi Mkoa wa Pwani, limevitahadharisha Vyama vinavyoshiriki Uchaguzi huo, kufuata Sheria na kusema halitasita kuwachukulia hatua kali za kisheria, wale wote watakao bainika kukiuka taratibu na Sheria za Uchaguzi.

Kamanda wa Polisi Mkoani humo, Ulrich Matei, amesema kuwa kupitia Vyombo vya habari, Jeshi hilo linavitaka vyama hivyo kufuata sheria na kanuni za Uchaguzi.

Vyama Vitano vya Siasa vinashiriki Uchaguzi huo, ambavyo ni (AFP), (CUF), (CCM), (NRA) na (CHADEMA), kufuatia aliyekuwa Mbunge wa Jimbo hilo, Said Bwanamdogo (CCM), kufariki dunia Januari 22 mwaka huu, wakati akitibiwa katika Taasisi ya Magonjwa ya Mifupa na Fahamu Muhimbili (MOI), jijini Dar es Salaam, ambako alikuwa amelazwa kwa muda wa wiki moja.