WAZIRI MEMBE ZIARANI UTURUKI KWA SIKU TATU

WAZIRI wa Mambo   ya Nje na Ushirikiano wa Kimataifa, Bernard Membe, yuko katika ziara ya kikazi ya siku tatu nchini Uturuki, kufuatia mwaliko wa Waziri wa Mambo ya Nje wa nchi hiyo, Ahmet Davutoglo.

 

Katika taarifa iliyotolewa kwa vyombo vya habari  na wizara hiyo jijini Dar es Salaam, leo Jumatano Mei 7, 2014 imesema madhumuni ya ziara hiyo ni kukuza na kuimarisha ushirikiano kati ya Tanzania na Uturuki ambao umedumu kwa kipindi kirefu sasa.

  

Membe na mwenyeji wake watajadili umuhimu wa kuimarisha ushirikiano kati ya Tanzania na Uturuki hususan, katika maeneo ya vipaumbele yaliyoainishwa katika mkutano wa Wakuu wa Nchi wa Afrika na Uturuki uliofanyika mwaka 2008. 

Maeneo hayo ni pamoja na biashara, uwekezaji, kilimo, mawasiliano, afya, elimu pamoja na amani na usalama, ambapo ameondoka nchini jana Jumanne Mei 6, na ziara hiyo imeanza leo Mei 7–9 Mei, 2014 katika nchi hiyo.

Katika ziara hiyo, Waziri ataonana na kufanya mazungumzo na viongozi mbalimbali wa Uturuki akiwemo Naibu Waziri Mkuu, wan chi hiyo Emrullah Isler, Waziri wa Uchukuzi, Usafiri wa Majini na Mawasiliano, Lutfi Elvan, Waziri wa Nishati na Maliasili, Tarrer Yildiz pamoja na kuongea na wafanyabiashara wa Uturuki.

Katika ziara hiyo, Waziri Membe, amefuatana na viongozi waandamizi kutoka Wizara ya Mambo ya Nje na Ushirikiano wa Kimataifa, Wizara ya Viwanda na Biashara, Wizara ya Kilimo, Chakula na Ushirika, Mamlaka ya Majengo Tanzania na Mamlaka ya Ukanda Maalum wa Uwekezaji (EPZA).