RAISI KIKWETE ATOA AJIRA ZAIDI KWA MAHAKIMU NCHINI

 

Arusha, Rais Jakaya Kikwete amesema, serikali inakusudia kuboresha utendaji wa mahakama  nchini  kwa kuongeza ajira katika sekta hiyo na kuendelea kufanya mabadiliko sheria  ambazo zimepitwa  na wakati.

Akifungua  Mkutano Mkuu wa siku nne wa Kimataifa wa Majaji wanawake,  Duniani  katika Kituo cha kimataifa cha mikutano cha  Arusha (AICC), Rais Kikwete alisema, kutokana na upungufu wa watendaji wa mahakama na mahitaji mengine wananchi wengi hasa masikini wakiwepo wanawake wanakosa haki zao.

"Serikali ina mikakati kadhaa ya kuhakikisha inaboresha sekta ya mahakama nchini ili kuhakikisha wananchi wanapata haki kwa wakati " alisema

Alisema hivi karibuni, serikali inakusudia kutoa ajira kwa mahakama wa mahakama mbalimbali wanaofikia 600 ili kupunguza tatizo la upungufu wa mahakimu.

Hata hivyo aliwataka majaji wanawake kwa ujumla wao kuendelea kusaidia upatikanaji wa haki kwa wakati ili kuondoa matatizo ya kesi kusikilizwa kwa muda mrefu.

Awali Rais  wa Chama cha Majaji Wanawake  Duniani Jaji  wa Rufaa Mstaafu Eusebia Munuo alisema,kauli mbiu ya mkutano huo ni kutolewa haki kwa usawa kwa wananchi wote.

Alisema utolewaji wa haki kwa usawa suala la utekelezwaji wa haki za binaadamu na akatoa wito kwa majaji wanawake kusaidia wananchi kupata haki zao.

Akizungumza mapungufu ya sheria, alieleza kuunga mkono jitihada za serikali ya Tanzania kuendelea kufanya mabadiliko ya sheria hasa ambazo zimepatiwa na wakati.

Alisema mkutano huo ambao umewashirikisha majaji zaidi ya 600 umeandaliwa kwa pamoja, Chama cha Majaji Wanawake  Duniani (IAWJ) na  Chama cha Majaji Wanawake Tanzania (TAWJA)

Mkutano huu unafanyika kwa mara ya kwanza hapa Tanzania tangu chama cha Majaji wanawake kianzishwe  mwaka 1991.

Jaji Mstaafu Munuo amesema, mkutano huo utawashirikisha Majaji zaidi ya 600  wanawake kutoka  nchi mbalimbali duniani wakiongozwa na Rais wa chama hicho

Alisema mkutano huo utatoa fursa  ya kupanua  wigo wa mawasiliano kati ya Majaji Wanawake Duniani ili kujenga mazingira mazuri ya utendaji kazi pamoja na  kujenga ubora na uadilifu katika utoaji wa haki na ukuzaji  wa haki za binaadamu.