Majeshi ya Somalia yaukomboa mji wa Koryoley

Majeshi ya Somalia yakishirikiana na vikosi vya kusimamia amani vya Umoja wa Afrika AMISOM yamefanikiwa kuukomboa na kuudhibiti mji wa Koryoley wa kusini mwa nchi hiyo uliokuwa chini ya udhibiti wa wanamgambo wa al-Shabab. 

Habari kutoka Somalia zinasema kuwa, mji huo muhimu ulioko yapata kilomita 90 magharibi mwa mji mkuu Mogadishu umekombolewa na vikosi vya AMISOM na vile vya serikali ya Somalia baada ya kupita takribani miaka mitano tangu ulipodhibitiwa na wanamgambo wa al-Shabab. 

Kukombolewa mji huo na kuondoka katika udhibiti wa wanamgambo wa al-Shabab kunahesabiwa kuwa ushindi muhimu kwa vikosi vya AMISOM na vile vya Somalia. 

Wiki iliyopita pia, vikosi hivyo vilifanikiwa kuukomboa mji muhimu wa kistratijia wa Bulobarde wa katikati mwa nchi hiyo kutoka mikononi mwa wanamgambo wa ash-Shabab. 

Hivi karibuni jeshi la Somalia likishirikiana na askari wa kulinda amani wa Umoja wa Afrika  AMISOM lilianzisha operesheni kali ya kijeshi dhidi ya wapiganaji wa kundi hilo la ash- Shabab, operesheni ambayo ina lengo la kulitokomeza kundi hilo ambalo limekuwa likihatarisha usalama nchini Somalia.