ARUSHA YAJIPANGA VEMA NA ROCK CITY MARATHONI.

NA; YOHANA CHALLE.

ARUSHA.

Timu ya Riadha ya Mkoa wa Arusha imeanza imeanza kuweke mikakati ya kwenda katika mashindano ya Rock City Marathoni yanayotarajia kufanyika mwezi ujao Mkoani Mwanza.

Akizungumzia hilo Kocha wa Riadha Mkoani Arusha, Thomas John alisema kuwa, ili kuhakikisha watakwenda kuchukua ubingwa tayari wameandaa mashindano ya ndani, ili kuchagua wanariadha watakao kwenda kuwakilisha mkoa katika mashindano hayo.

“Ili mwanariadha apate nafasi ya kuchaguliwa katika timu ya Mkoa lazima ashiriki mashindano manne mfululizo na kufanikiwa kuingia katika kila hatua inayofuatwa” alisema John.

Mashindano ya Rock City Marathoni yanatarajia kufanyika Mkoani mwanza Septemba 15 mwaka huu, yakishirikisha wanariadha kutoka ndani na nje ya Tanzania.

“Mkoa wetu tunatarajia kupeleka zaidi ya wanariadha 30 Mkoani Mwanza, Kutokana na kupewa nafasi kubwa ya wanaridha, Pia Mkoa wetu ulifanya vizuri katika mashindano ya Rotary yaliyofanyika mwezi huu jijini Dar es Salaam yakiwa maalum ya kumuenzi Baba wa Taifa Hayati Julias K. Nyerere” alisema John.

Hata hivyo Kocha huyo alisema kuwa licha ya kujiandaa na mashindano hayo, tayari wameanza mikakati ya kujiandaa na mashindano ya Nyika ya Cross Country yatakayofanyika mwakani mwezi wa tatu katika nchi ya Uganda jijini Kampala.

Mashindano ya Nyika yatafanyika katika makundi  mawili ambapo kundi la kwanza watashiriki mbio za Km 8, wakati kundi lingine litashiriki Mbio za Km 12.